راولپنڈی: پاک فوج کے شعبہ تعلقات عامہ (آئی ایس پی آر) کی جانب سے اتوار کو جاری کردہ ایک بیان میں کہا گیا ہے کہ سیکیورٹی فورسز نے جنوبی وزیرستان میں انٹیلی جنس پر مبنی آپریشن (آئی بی او) میں 8 دہشت گردوں کو ہلاک کردیا۔

فوج کے میڈیا ونگ کے مطابق فورسز نے دہشت گردوں کی موجودگی کی اطلاع پر سراروغہ کے جنرل علاقے میں آپریشن کیا۔

بیان میں کہا گیا ہے کہ آپریشن کے دوران فوجیوں اور دہشت گردوں کے درمیان شدید فائرنگ کا تبادلہ ہوا جس کے نتیجے میں آٹھ دہشت گرد مارے گئے۔

آئی ایس پی آر کا کہنا تھا کہ مارے گئے عسکریت پسند سیکیورٹی فورسز کے ساتھ ساتھ معصوم شہریوں کے خلاف متعدد دہشت گردانہ کارروائیوں میں سرگرم رہے۔

سیکورٹی فورسز نے ان کے قبضے سے اسلحہ، گولہ بارود اور دھماکہ خیز مواد بھی برآمد کیا۔

آئی ایس پی آر نے مزید کہا کہ آپریشن علاقے میں پائے جانے والے دیگر دہشت گردوں کو ختم کرنے کے لیے کیا جا رہا ہے کیونکہ پاکستان کی سیکیورٹی فورسز ملک سے دہشت گردی کی لعنت کو ختم کرنے کے لیے پرعزم ہیں۔